Ngjarja horror e ndodhur dje në Durrës, ku dy fëmijë humbën jetën dhe një tjetër ndodhet në gjendje të rëndë, ka tronditur edhe një herë shoqërinë shqiptare.
Një tronditje që përsëritet pothuajse çdo javë, ku drejtues kamikazë mjetesh marrin jetë të pafajshme – fëmijë dhe të rritur që nuk kanë asnjë faj.
Sot, të ecësh në rrugët tona është bërë e frikshme. Është thuajse e pamundur të mos përballesh me disa aksidente në ditë. Është e pamundur të mos ndihesh i rrezikuar, kur shoferë të papërgjegjshëm të afrohen dhe të qëndrojnë ngjitur pas makinës, duke vënë në rrezik jetën tënde dhe të të tjerëve.
Rastet janë të përditshme, ndërsa masat ndaj këtyre “kamikazëve” janë thuajse zero.
Policia rrugore, me gjithë respektin, duket e dorëzuar përballë kësaj maskarade të përditshme.
Qëndrimi i policisë rrugore, teksa fshihen pas pemëve me radar në dorë apo pas kthesave, është një shëmti e pastër që nuk shërben aspak për parandalimin e ngjarjeve të tilla kriminale, por vetëm i shton ato.
Kjo qasje i kthen kontrollet në një mjet përfitimi financiar, duke ushqyer korrupsionin, shtuar aksidentet dhe rastet fatale.
Para disa javësh, drejtori i ri Skënder Hita kërkoi që makinat të mos ndalohen, por të përdoret teknologjia. Në dukje, një masë e duhur, por kontrolli me mjete civile në autostrada mbetet një emergjencë.
Ndërsa të gjithë janë të shokuar nga ngjarja e Durrësit, politikanët që duhet të ngrenë zërin për masa konkrete ligjore, duken më të shqetësuar për pamjet që publikohen.
Sikur të ishin kaq të shqetësuar për mosrespektimin e rregullave, sot do të kishim më pak pamje tragjike në media.
Ndërkohë që sezoni veror ka nisur para kohe, me një rritje të ndjeshme të turistëve në Shqipëri, policia duhet të ngrihet në këmbë në të gjitha akset rrugore për të garantuar jetën e qytetarëve dhe të vizitorëve.
Sot, akset kombëtare në Shqipëri janë kthyer në skena krimi, ndërsa të gjithë duken të gjunjëzuar përballë këtij fenomeni.
Shtetarët duhet t’i kthejnë fjalët e Facebook-ut në vepra konkrete, për të garantuar jetën e qytetarëve që i kanë votuar dhe u kanë besuar drejtimin e vendit.
