Në Apelin e GJKKO-së është shtyrë seanca ku do të shqyrtohej ankimi i kryebashkikaut të Tiranës, Erion Veliaj, kundër vendimit të GJKKO-së për pezullimin e afateve të paraburgimit. Shkak për shtyrjen e seancës është bërë parregullsia e mënyrës se si Veliaj është njoftuar në qeli për seancën që pritej të zhvillohej sot. Ndërkohë, seanca e radhës u la më datë 29 prill, ora 09:30.
“Është instaluar një praktikë ku ka një dënim kolektiv kur mungon një avokat i një të bashkëpandehuri, u pezullohen afatet e paraburgimit të gjithë të pandehurve. Praktikë antikushtetuese. Absurde. Sot ishte njoftuar klienti, por u shty për shkak të një parregullsie. Ishte një parregullsi për mënyrën si ishte firmosur dhe për të mos u bërë shkak që të cenohet vendimi, gjykata me të drejtë vendosi të shtyhet seanca me 4 ditë. Më e rëndësishmja është ndryshimi i kësaj praktike, po dëmtohen të paraburgosurit, nuk ka arsye tu pezullohet paraburgimi”, tha avokati Plarent Ndreca.
