Barcelona triumfoi bindshëm në përballjen më të madhe të futbollit spanjoll, duke mposhtur këtë të dielë në ‘Camp Nou’ Realin e Madridit me rezultatin e pastër 2-0 në El Clasico, rezultat që ‘vulosi’ titullin kampion për sezonin 2025-26 në La Liga. Barcelona siguroi titullin e 29-të të La Ligas në histori, teksa e bën për vitin e dytë radhazi me Hansi Flick në stol. Hera e fundit që titulli kampion vendosej në El Clasico ishte në vitin 1932, por asokohe festonte Real Madridi.
Skuadra katalanase kaloi në epërsi që në minutën e 9-të, kur Marcus Rashford realizoi një gol spektakolar nga goditja e dënimit. Vetëm nëntë minuta më vonë, pas një aksioni model, Ferran Torres dyfishoi shifrat në 2-0.
Barcelona e zgjidhi praktikisht ndeshjen brenda 18 minutave të para dhe më pas administroi me qetësi rezultatin deri në fund. Edhe pse krijuan disa raste të tjera, vendasit nuk arritën ta shënonin golin e tretë.
Në pjesën e dytë nuk munguan tensionet, por Barça ia doli të siguronte trofeun e kampionit pas ndeshjes El Clasico. Barcelona ngjitet në 29 trofe të La Ligas, por Reali mbetet në krye me 36 trofe të fituar.
Ndeshje e çuditshme për Hansi Flick, që paçka dhimbjes për humbjen e të atit qëndroi në stol dhe drejtoi ekipin drejt suksesit.
